Vraag 10: “Verstaan julle wat Ek vir julle gedoen het?”

VRAAG 10: “VERSTAAN JULLE WAT EK VIR JULLE GEDOEN HET?”
JOHANNES 13:12 8 APRIL 2018

INLEIDING
Het jy al ‘n modelvliegtuigie of modelkarretjie gebou? Of ‘n legkaart?
Dit was heerlik om die pakkie oop te maak, al die deeltjies uit te haal, die instruksies te begin lees, en dan met die bouwerk te begin. Elke keer as jy vasdraai, kon jy na die prentjie kyk en die instruksies volg.
Alles is makliker as jy ‘n model het, ‘n voorbeeld wat jy kan navolg.
Dit is wat Jesus ook hier doen, Hy gee die dissipels ‘n voorbeeld, ‘n model waarvolgens hulle kan optree.

AGTERGROND
In Jesus se tyd was die samelewing gestruktureer volgens ‘n Piramiede. Heelbo was die magtiges, die rykes en geleerdes. Die mense wat ales beheer het, wat al die regte kontakte gehad het. Hulle was die mense wat in beheer was, en wat die dinge laat gebeur het.
Aan die onderpunt was die magteloses, die slawe, die ongeleerdes, die vreemdelinge. Die was hulle werk om die mense wat bo aan die Piramide was te dien. Een van die maniere wat die aan die onderpunt die wat bo was moes dien was om hulle voete te was na ‘n reis of wanneer hulle by die huis gekom het. Dit was stofpaaie en hulle het sandale gedra, so die voete moes eers gewas word voordat hulle die vertrek binne gekom het. Dit was die laagste vorm van werk wat mens jou kon voorstel en daarom het die laagste van die slawe die werk gedoen.
Nou kan ‘n mens jou voorstel toe die dissipels saam met Jesus bymekaar kom vir die Paasoffer maaltyd. Wie gaan hierdie werk doen? Wie gaan so laag daal om dit te doen? Nie een van hulle was bereid om dit te doen nie.
Toe Jesus die skottel water vat en die handdoek en hulle voete begin was, het Hy die ondenkbare gedoen. Hy het Homself daarmee met die mense aan die onderpunt van die sosiale Piramide geidentifiseer. Letterlik het Hy, soos Filippense 2:7 sê, die gestalte van ‘n slaaf aangeneem en aan die laagste mense in die samelewing gelyk geword. Jesus, die een wat in beheer is, die een wat in hulle kring nommer een is, Hy gee Homself prys en neem die gestalte aan van ‘n dienskneg en was hulle voete.
Petrus se reaksie was daarom nie so snaaks nie. In Johannes 13:6-8 is Petrus ontsteld oor wat Jesus doen, hy sê: “Here, gaan Ú mý voete was?”
Jesus se antwoord aan hom was dat al begryp hy nie noú nie, hy dit later sal verstaan. Nie dat Petrus daarmee tevrede was nie. Dit het net nie vir hom reg gevoel dat Jesus hierdie ondankbare werk om voete te was, iets wat ‘n slaaf sou kon weier, dat Hy dié werkie sou doen nie. Hy was immers God se Seun. Dit het net nie gepas by Hom dat Hy hulle almal se dienskneg word nie.
Daarom sê Petrus vir Hom: “U sal in alle ewigheid nooit my voete was nie!”
Jesus oortuig egter vir hom dat dit enigste manier is waarop hy deel aan Jesus sou kry, as Jesus sy dienskneg sou word en sy voete was. Getrou aan Petrus se aard wil hy sommer oorboord gaan en heeltemal gewas word, maar Jesus weier omdat die aanvaarding van die voetewas genoeg was.
Toe Jesus hulle voete klaar gewas het, het Hy sy aksie aan hulle verklaar. As Hy, wat hulle Here en Leermeester is, dan hulle voete gewas het, behoort hulle ook mekaar se voete te was. Jesus het nou vir hulle ’n voorbeeld gestel, en soos Hy vir hulle gedoen het, só moet hulle ook vir mekaar doen. “Julle weet dit nou; gelukkig is julle as julle dit ook doen.”

1. JESUS WAS SY VERRAAIER EN SY VERLOËNAAR SE VOETE
‘n Mens sou dink dat dit al erg genoeg was, maar die vernedering wat Jesus Homself oplê gaan nog dieper.
Soos ons gesien het, twee persone word uitgelig in die verhaal van Jesus wat die dissipels se voete was. Judas en Petrus.
Judas sou Jesus verraai en Petrus sou Jesus verloën, Petrus sou Hy in die binnehof staan waar Jesus verhoor word dié nag, en drie maal sê, ek ken dié man nie. Ek ken dié man nie. Ek ken dié man nie!
Tog deins Jesus nie terug daarvan om Homself te verneder en hulle voete te was nie, Judas s’n en ook Petrus s’n. Jesus deins uiteindelik selfs nie terug van die kruisdood waaraan Judas aktief meewerk deur sy verraad en Petrus passief deur sy verloëning nie.

2. JESUS HET SY EIE MENSE TOT DIE UITERSTE LIEFGEHAD
Dit is ontstellend en ontblotend, want ons kry dit miskien nog reg om diens te lewer vanuit ons vermoëns en ons gawes. Dit kan selfs vir ons op een of manier bevredigend wees, maar dit raak regtig moeilik as ons mense wat ons verraai, mense wat ons verloën, wat ontken dat hulle ons ken, as ons dié mense se voete moet was.
En tog, dít is wat Jesus van ons vra. Ons moet die pad stap met die Judasse en met die Petrusse. Ons moet voete was in die volle wete dat die resultaat moontlik nie sal wees soos ons graag wil hê dat dit moet wees nie.
Hoe sal ons dit regkry?
Wel, ons het net een antwoord, en dit is te vinde in die rede hoekom Jesus dit doen.
Hoekom was Jesus Judas en Petrus se voete?
Want, sê Johannes in hoofstuk 13:1, Jesus het sy eie mense wat in die wêreld is, liefgehad, Hy het hulle tot die uiterste toe liefgehad. Die geheim lê in die liefde, die liefde wat geduldig is, en vriendelik. Die geheim lê in die liefde wat nie afgunstig is nie, nie grootpraterig nie, en nie verwaand nie. Dit handel nie onwelvoeglik nie, soek nie sy eie belang nie, is nie liggeraak nie, hou nie boek van die kwaad nie. Dit kan hom nooit verbly oor onreg nie, maar sal altyd hom verheug oor die waarheid. En soos Paulus in daardie ongelooflike diep hoofstuk oor die liefde in sy eerste brief aan die Korintiërs sê: “Die liefde bedek alles, glo alles, hoop alles, verdra alles.”
Liefde is alleen moontlik in ‘n verhouding met Jesus, want dié liefde is ‘n gawe wat Hy gee. Laat ons nie vergeet nie, vir Petrus bring die voetewas die begin van die verandering, toe Hy Jesus toelaat om hom lief te hê. Want, die voetewas is uiteindelik ‘n simbool van die kruis, die finale en deurslaggewende liefdesdaad van Jesus. Die liefde van die kruis bring daarom uiteindelik vir Petrus die lewe, toe hy Jesus toelaat om hom lief te hê en te herstel as leier van die dissipelkring. Drie maal vra Hy vir Petrus, het jy my lief? En drie maal antwoord Petrus, u weet dat ek u liefhet.
Vir Judas bring die liefde van die voetewas en die kruis egter die dood, toe hy wegvlug van Jesus en weier om tot inkeer te kom. Jesus se liefde word in Judas se geval verwerp en die boek oor Judas word uiteindelik toe gemaak.

3. LAAT JESUS DEUR JOU ANDER SE VOETE WAS
Ons kan Jesus dus net navolg in sy voorbeeld as ons toelaat dat Hy ons liefhet, as ons Hom toelaat om ons lief te hê. Daarin lê die krag wat ons soos Hy sal maak.
Dan kan ons die voorbeeld van Jesus volg, om mense te wen, die Judasse en die Petrusse, deur selfprysgawe en deernisvolle diens. Dan kan ons waag met mense. Dit is die mense wat aan ons bekend is as verraaiers en verloënaars. “Gelukkig is julle as julle dit ook doen.”
Die punt is, dat ons Jesus moet toelaat om deur ons ander se voete op dieselfde wyse te was, dat sy liefde na ander sal vloei deur ons.
“Gelukkig is julle as julle dit ook doen.”

SLOT
Stephen Covey skryf daar is drie woorde wat baie belangrik is in mense se lewens. Die eerste is afhanklikheid – dis vir babas en kinders wat nie op hul eie kan leef nie. Die tweede woord is onafhanklikheid – waar ons emosioneel en intellektueel op ons eie voete kan staan. Die werklike kuns van die lewe is egter om te groei na die derde woord – interafhanklikheid.
Interafhanklikheid beteken ek besef ek word gevorm en gemaak deur die verhoudings in my lewe. Met God, met mense en met alle lewende dinge. Ek is wie ek is, omdat ander in my lewe is en ek in hulle lewe is. Dis maar net ander woorde om die liefde van Johannes 13 te beskryf. Ek is nie net hier te wille van myself- my eie belang en voordeel nie. Ek is hier ter wille van ander en hulle is hier ter wille van my. Ek het ander mense nodig en hulle het my nodig. Ek kan natuurlik alleen ook, maar ek wil nie. Veral as ek aan Jesus behoort. Hy was ons deur sy bloed tot ware eenwees met Hom en met mekaar. Sodat almal kan weet deur die kwaliteit van ons liefde vir mekaar, dat ons Sy dissipels is.

Trackback from your site.

Leave a comment

nha cai uy tin , nha cai uy tin , tap chi me va be , casino truc tuyen , casino uytin , casino totnhat , danh bai , poker online , casino , bao ve viet nam , bao ve viet nam , suc khoe , thoi trang nam 2014 , suc khoe 2014 , shop thoi trang , tin tuc thoi trang phim le , hi tech , tin cong nghe , cong nghe , thoi su , tin moi , thoi trang , the gioi smartphone , cong nghe , may tinh bang gia re , dien thoai , su kien , game mobile , nghe si viet , the gioi nhac , nha cai , dien dan bong da , best bookies, clevermart.vn , goldcare.vn , phonereview.vn , tinhangngay.vn , sieuthisachnoi.com , doctruyentranh.tv , sieuthismartphone.vn , kinhthongminh.org , thietbithongminh.tv , sieuthithietbiso.org ,